Fundjava që vjen sjell ndeshjet e fundit të sezonit vjeshtor dhe disa prej përballjeve më të rëndësishme të Kampionatit të Kosovës në pingpong. Të shtunën, më 26 shtator, dhe të dielën, më 27 shtator, do të zhvillohen ndeshjet përmbyllëse të Superligës M&F dhe Ligës së Parë M&F, ndërsa disa prej dueleve të kësaj jave pritet të përcaktojnë edhe fatin e ekipeve në krye dhe në fund të tabelës.
LIRIA – LIDHJA E PRIZRENIT: PËRBALLJA QË VENDOS KAMPIONIN
Në Superligën e Meshkujve, gjithçka do të vendoset në një duel direkt mes dy ekipeve që kanë dominuar garën këtë sezon.
KPP Liria hyn në javën e fundit në pozitën e parë me 22 pikë dhe 11 fitore, ndërsa KPP Lidhja e Prizrenit ndodhet vetëm një pikë prapa, me 21 pikë. Të dyja skuadrat do të përballen të dielën, në xhiron e fundit, në një ndeshje që pritet të përcaktojë kampionin e sezonit.
EDHE SUPERLIGA E FEMRAVE MBYLLET ME PËRBALLJE INTERESANTE
Te femrat, KPP Liria e ka siguruar praktikisht titullin pas një sezoni perfekt me 9 fitore në 9 ndeshje dhe 18 pikë. Në xhiron e fundit, kampionet do të përballen me Gjilanin F, që aktualisht mban vendin e dytë me 16 pikë.
LIGA E PARË: DY SKUADRAT QË SIGURUAN SUPERLIGËN
Në Ligën e Parë për Meshkuj, gara kryesore tashmë është vendosur: KPP Ponte Prizreni dhe KPP Gani Maloku kanë siguruar promovimin në Superligë.
Ponte Prizreni e ka dominuar sezonin me 13 fitore në 13 ndeshje dhe 26 pikë, ndërsa Gani Maloku renditet i dyti me 24 pikë. Në xhiron e fundit, Ponte Prizreni do të përballet me TTC Ferizaj në Palestrën “Astrit Bytyçi”.
Te Liga e Parë për Femra, Gani Maloku dhe Shkolla Ahmet Hoxha F ndajnë kreun me nga 21 pikë, ndërsa vendet e para tashmë janë të sigurta për të dyja ekipet.
Ndeshjet e fundit të Superligës M&F dhe Ligës së Parë M&F zhvillohen më 26 dhe 27 shtator në palestrat “Tefik Çanga” dhe “Astrit Bytyçi”.
Të dielën, në Palestrën “Astrit Bytyçi”, nga ora 10:00, zhvillohet gjithashtu edhe play-off-i i Ligës së Dytë, ku përballen Skenderaj, Ulpiana, Llapusha dhe Istogu. Në gjysmëfinale takohen Skenderaj – Istogu dhe Llapusha – Ulpiana. Dy fituesit do të sigurojnë promovimin në Ligën e Parë, ndërsa skuadrat humbëse do të vazhdojnë garat në Ligën e Dytë.
Bashkangjitur këtu gjeni njoftimin e plotë me orarin, përballjet dhe renditjet aktuale të të gjitha ligave.
